JAW YA AI (It’s better to give than receive)

Shiggyim masha shagu gaw myit simsa ai lam lu la na matu tinang a prat hta grai ahkyak ai lam langai rai nga ai hpe ning dang nlu rai nga ai. Myit a simsa ai lam lu la ai wa gaw shawng lam a matu kaji dik ai amu hpe sha rai timung shalat nna chye galaw lu nga ai.

Kanu langai mi kaga mare kaw nga ai shi a kasha Jimmy hpe sa jahkrum ai shaloi Jimmy gaw kanu hpe lu sha seng langai mi de woi sa nna shana shat daw jaw ai.  Shan nu hte nau n tsan ai saboi kaw dung nga ai la langai mi gaw shi htet da ai lu sha a matu jaw na gumhpraw $2 ra nga ai hpe Jimmy gaw hpa mung n san ai sha mani sum myi man hte jaw kau ya nu ai. 

Gumhpraw jaw ya ngut nna shi a dung shara de wa ai shaloi a yoi $ 1 hpe da sang jahkrat dat nu ai. Kanu gaw kasha a lak lai ai jasat hpe yu nna mau nga ai. Dai ten hta sha ma kasha langai mi gaw seng kata kagat gin sup hkawm ai nga yang dai a yoi hpe mu hta la nna lu sha seng shing gan de pru nna ice-cream sa mari la let bai nhtang wa ra ai. Shi a kanu yan kawa hpe mung gara hku rai nna gumhpraw mu hta nna ice-cream mari sha ai lam hpe kabu gara tsun dan nga lu ai.

Lani mi kanu gaw mawdaw sau bang na matu la nga yang shi a shawng na dingla langai gaw sau bang na matu liter 15 a malai $15 dip shut kau ai majaw $5 a matu dip shajan kau nu ai. Dai kanu gaw hpa mung n tsun ai sha mani sum rai ra nga ai gumhpraw hpe shaw ya dat nu ai. Dai la wa gaw chyasam langai mi shi a ra nga ai sau jahpu hpe jaw ya ai gaw shi a prat hta shawng ning nan lang rai nga lu ai. Nau mau mat nna Jimmy a kanu hpe nang hpa majaw ndai hku galaw nni? ngu san dat nu ai. Kanu gaw dai zawn galaw nga yang shi kasha a myi man hpe shing ran mu dat let grai myit pyaw nga nu ai.

Hpang shani jang kanu gaw kasha hpang de laika langai mi ka dat nu ai,  “Tsaw ra ai ma, Nu hpe jaw ya chye na matu sharin ya ai ma hpe grai chyeju dum ai majaw laika ka dat ai re. Nu nang kaw sa chyai ai shaloi nang $ 3 hpe hpa lachyum npru ai lahpawt lama di nna chya-sam wa a matu shama ai hpe Nu nchye na nna grai mau kau ai re. Dai lam hpe Nu sung sung bai nhtang myit yu ai shaloi ma gaw grai kaba ai hte kaja ai kasi Nu hpe madun dan sai re. Dai zawn galaw ai a akyu a ra gaw hpa hte mung n galai lu ai myit sim sa lam rai nga ai. Tsaw ra ai,  Nu.”

Lahta na mabyin ni gaw jahpu manu hku nna n law ai rai tim teng teng sha ra gadawn dik nga ai wa a matu gaw daw dan nlu manu dan la nga ai hpe mu lu nga ai. Ten langai mi hta sha, mani sum sai re ai myiman hpe mu lu yang langai wa a myit hta grai simsa ai hte myit pyaw la nga ai re. Ma kaji ni gaw hpa mara nlu ai hte san seng dik ai ni rai nga ma ai. Ma ni mani ai shaloi grai yu tsaw ra na zawn re rai nga ai. Anhte kadai wa raitim ma hpe yu tsaw ra ai hkrai rai nga ga ai. Anhte shinggyim masha ni gaw shada da tsaw ra hkat na matu pra nga ai ni rai nga ga ai. Tsaw ra ai gaw mani sum re ai kaw na hpang ai rai nga ai. Mani sum re gaw shada a ganawn mazum lam grau ngang kang shangun lu ai lam mung rai nga ai. Marai langai ngai a mani sum sai re ai gaw kaga langai ngai a kraw dung masin a sung htum ai shara langai mi kaw du hkra jung shangun lu nga ai.

Jaw ya ai lam law law nga ai kaw na anhte shada jaw ai lam hta ja gumhpraw jaw lu ai zawn jahpu manu n hkrat ai sha jaw ya mai ai lam ni mung law law nga nga ai re, n-gun jaw ga tsun nna mai shalan shabran ai zawn shi hpe lata jum ya ai, hkum hpe a hpuk nna mung n-gun jaw mai nga ai. A ten jaw nna mung mai garum shing tau la hkat nga ai. N ta sin ya ai, ma woi ya ai, gat sa mari ya ai, ma jawng sa tau ya ai zawn re ni rai nga ai.

Tinang lu ai hpa rai timung manang wa hpe garan jaw ya ai mung lu la ai wa a myit hpe grai chyeju dum kabu shangun lu nga ai. Kalang lang jaw ya ai wa a matu hpa sha nrai timung hkam la lu ai wa a matu gaw manu daw dan nlu hkra rai grai manu dan la nga ai re. Hkam la ai wa kabu ai hta jaw ya ai wa mahtang grau myit dik myit pyaw ai lam lu la nga ai re.

                                                                                            Miwa Bawk Tawng